ក្រសួងទេសចរណ៍នៃព្រះរាជាណាចក្រកម្ពុជាសហការជាមួយអាជ្ញាធរជាតិទេសចរណ៍នៃព្រះរាជាណាចក្រថៃបានផលិតវីដេអូផ្សព្វផ្សាយគោលដៅទេសចរណ៍រួមគ្នា “ព្រះរាជាណាចក្រពីរគោលដៅទេសចរណ៍ តែមួយ” (Two Kingdoms One Destination) ដើម្បីអបអរសាទរខួប៧០ឆ្នាំនៃចំណងការទូតរវាង ព្រះរាជាណាចក្រកម្ពុជា និងព្រះរាជាណាចក្រថៃឆ្នាំ២០២០ ក៏ដូចជាអនុវត្តតាមស្មារតីអនុស្សរណៈនៃការ យោគយល់គ្នាក្នុងការផ្សព្វផ្សាយគោលដៅទេសចរណ៍រវាងប្រទេសទាំង២ ឱ្យកាន់តែមានប្រសិទ្ធិភាព ខ្ពស់ ព្រមទាំងជួយជម្រុញលំហូរទេសចរ និងវិនិយោគិនរវាងប្រទេសទាំងងពីរ និងប្រទេសទី៣ ឱ្យមក ទស្សនា និងវិនិយោគនៅកម្ពុជា-ថៃកាន់តែច្រើនឡើងថែមទៀត ក្នុងកំឡុង និងក្រោយវិបត្តិនៃជំងឺកូវីដ-១៩ ស្របពេលដែលវិស័យទេសចរណ៍ពិភពលោកកំពុងប្រឈមការគម្រាមកំហែងពីជំងឺកូវីដ-១៩ ដោយ ចំនួនទេសចរធ្លាក់ចុះយ៉ាងខ្លាំងស្ទើរគ្រប់តំបន់។

ក្នុងវីដេអូនោះដែរ កម្ពុជាបានបង្ហាញអំពីគោលដៅទេសចរណ៍រូបីនិងអរូបីបេតិកភណ្ឌពិភពលោករួម មាន ប្រាសាទអង្គរវត្ត ប្រាសាទព្រះវិហារ ប្រាសាទសំបូរព្រៃគុក របាំអប្សរា ល្ខោនខោល នំបញ្ចុក ទន្ទឹមនឹងនេះកម្ពុជាក៏បានរំលេចសក្ដានុពលទេសចរណ៍ដ៏សម្បូរបែបរបស់ខ្លួនមានដូចជា ទេសចរណ៍ ធម្មជាតិ អេកូទេសចរណ៍ កសិទេសចរណ៍ នៅតាមតំបន់ឆ្នេរនិងភូមិភាគឦសាន រួមជាមួយល្បែង ប្រជាប្រិយ ការរស់នៅប្រចាំថ្ងៃរបស់ប្រជាជនខ្មែរ ព្រមទាំងពិធីបុណ្យប្រពៃណីជាតិសំខាន់មួយចំនួន ផងដែរ។

យោងតាមរបាយការណ៍របស់អង្គការទេសចរណ៍ពិភពលោក (UNWTO) បានព្យាករណ៍ថា វិបត្តិកូវីដ-១៩ នឹងធ្វើឱ្យចំនួនទេសចរអន្តរជាតិធ្លាក់ចុះក្នុងរង្វង់ជាង ៨០% ក្នុងឆ្នាំ ២០២០ យ៉ាងណាមិញវិស័យកសិកម្ម បូកជាមួយទេសចរណ៍ផ្ទៃក្នុង (ទេសចរក្នុងស្រុក និងជនបរទេសដែលរស់នៅ រឺធ្វើការនៅកម្ពុជា) នឹងដើរតួនាទីយ៉ាងសំខាន់មួយផ្នែកក្នុងការអង្រឹងសេដ្ឋកិច្ចជាតិ។

សម្រាប់ខ្លឹមសារលម្អិតនៅក្នុងវីដេអូ សូមចូលទស្សនានៅលើទំព័រហ្វេសប៊ុក Tourism Cambodia Promotional, Ministry of Tourism និងចូលរួមផ្សព្វផ្សាយបន្តឱ្យបានផុលផុស៕