ក្រសួងទេសចរណ៍ ផ្សព្វផ្សាយវិធានការគោលនយោបាយ អនុវត្តយុទ្ធនាការ «ឆ្នាំទស្សនាកម្ពុជា ២០២៣»

(ភ្នំពេញ)៖ ក្រសួងទេសចរណ៍ នាថ្ងៃទី២៨ ខែមេសា ឆ្នាំ២០២៣នេះ បានប្រកាសផ្សព្វផ្សាយវិធានការគោលនយោបាយអនុវត្តយុទ្ធនាការឆ្នាំទស្សនាកម្ពុជា ២០២៣ (Visit Cambodia Year 2023) និងសារាចររាជរដ្ឋាភិបាល ស្តីពីការរៀបចំយុទ្ធនាការឆ្នាំទស្សនាកម្ពុជា ២០២៣នេះ ព្រមទាំងបានលើកអនុសាសន៍មួយចំនួន ដល់គ្រប់ភាគីពាក់ព័ន្ធផងដែរ។
ការប្រកាសនេះធ្វើឡើងក្រោមអធិបតីភាពឯកឧត្ដម ទិត ចន្ថា រដ្ឋលេខាធិការប្រចាំការក្រសួងទេសចរណ៍, អនុប្រធានក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ និងជាសមាជិកក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា នាថ្ងៃទី២៨ ខែមីនា ឆ្នាំ២០២៣ នៅទីស្តីការក្រសួងទេសចរណ៍។
ឯកឧត្ដម ទិត ចន្ថា បានឱ្យដឹងថា យោងតាមផែនទីចង្អុលផ្លូវ និងដោយអនុវត្តតាមអនុសាសន៍ណែនាំរបស់សម្ដេចតេជោនាយករដ្ឋមន្រ្តី យុទ្ធនាការឆ្នាំទស្សនាកម្ពុជា ២០២៣ ត្រូវបានរៀបចំឡើងក្នុងគោលបំណងសំខាន់២ រួមមាន៖ ទី១. លើកកម្ពស់កិត្តិនាមទេសចរណ៍ «កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ» នៅលើទីផ្សារទេសចរណ៍ឱ្យកាន់តែខ្លាំងក្លា និងទី២.ផ្សារភ្ជាប់រវាងព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ និងយុទ្ធនាការ “ឆ្នាំទស្សនាកម្ពុជា ២០២៣” ដើម្បីបង្កើនឧត្ដមភាពប្រកួតប្រជែងទេសចរណ៍កម្ពុជាក្រោយវិបត្តិជំងឺកូវីដ-១៩។
ឯកឧត្ដមរដ្ឋលេខាធិការប្រចាំការបានបន្តថា ដើម្បីសម្រេចបាននូវគោលបំណងនេះ វិធានការគោលនយោបាយអនុវត្តយុទ្ធនាការឆ្នាំទស្សនាកម្ពុជា ២០២៣ ត្រូវបានរៀបចំដោយផ្អែកលើអភិក្រមនៃការជំរុញព្រឹត្តិការណ៍ ដែលក្នុងនោះមានព្រឹត្តិការណ៍អន្តរជាតិនិងជាតិចំនួន២២ព្រឹត្តិការណ៍ និងព្រឹត្តិការណ៍កម្រិតមូលដ្ឋាននៅទូទាំង២៥រាជធានី-ខេត្ត និងអភិក្រមនៃការផ្សព្វផ្សាយ និងទំនាក់ទំនងសាធារណៈ តាមរយៈការដាក់ចេញនូវយុទ្ធនាការឆ្នាំទស្សនាកម្ពុជា ២០២៣ ក្រោមពាក្យស្លោក “គ្រប់ថ្ងៃគឺជាអច្ឆរិយភាព” (Every day is a Wonder) ដែលមានលម្អិតក្នុងវិធានការទាំង១៩។ ក្នុងន័យនេះ ការកំណត់ទីតាំងទីផ្សារទេសចរណ៍កម្ពុជា (Positioning) នៅលើទីផ្សារក្នុងតំបន់ និងសកលោកក្រោយវិបត្តិជំងឺកូវីដ-១៩ គឺពិតជាមានសារៈសំខាន់ជាយុទ្ធសាស្ត្រ ដើម្បីឈានទៅដាក់ចេញនូវយុទ្ធនាការផ្សព្វផ្សាយដ៏មានប្រសិទ្ធភាព ជាមួយការបង្កើត Branding និងសារខ្លីៗដែលមានភាពទាក់ទាញ និងងាយចងចាំសម្រាប់ភ្ញៀវទេសចរ។
នាឱកាសនោះ ឯកឧត្ដម ទិត ចន្ថា បានលើកឡើងនូវអនុសាសន៍មួយចំនួនដើម្បីជំរុញការអនុវត្តវិធានការគោលនយោបាយអនុវត្តយុទ្ធនាការ «ឆ្នាំទស្សនាកម្ពុជា ២០២៣» ឱ្យសម្រេចបានជោគជ័យប្រកបដោយប្រសិទ្ធភាព ដូចខាងក្រោម៖
ទី១. ស្នើឱ្យគ្រប់ក្រសួង-ស្ថាប័នរដ្ឋ រដ្ឋបាលរាជធានី-ខេត្ត ផ្នែកឯកជន និងប្រជាពលរដ្ឋគ្រប់រូបចូលរួមអនុវត្តតាមស្មារតីនៃវិធានការគោលនយោបាយអនុវត្តយុទ្ធនាការ «ឆ្នាំទស្សនាកម្ពុជា ២០២៣» និងសារាចររាជរដ្ឋាភិបាលស្តីពីការរៀបចំយុទ្ធនាការឆ្នាំទស្សនាកម្ពុជា ២០២៣ ដើម្បីជំរុញយុទ្ធនាការដ៏មានសារៈសំខាន់នេះឱ្យទទួលបានជោគជ័យ ចូលរួមគាំទ្រដល់ការងើបឡើងវិញនៃកំណើនទេសចរណ៍កម្ពុជាពីវិបត្តិជំងឺកូវីដ-១៩។
ទី២. ស្នើដល់គ្រប់ភាគីពាក់ព័ន្ធទាំងអស់ ទាំងក្រសួង ស្ថាប័នរដ្ឋ និងប្រតិបត្តិករក្នុងវិស័យឯកជនចូលរួមប្រើប្រាស់ និងផ្សព្វផ្សាយនិមិត្តសញ្ញា (Logo) របស់យុទ្ធនាការឆ្នាំទស្សនាកម្ពុជា ២០២៣ ឱ្យបានទូលំទូលាយនៅគ្រប់ស្ថាប័ន មូលដ្ឋានអាជីវកម្មទេសចរណ៍ គោលដៅទេសចរណ៍ រមណីយដ្ឋានទេសចរណ៍ និងសម្បទាគាំទ្រនានា ជាអាទិ៍ នៅលើយន្តហោះនៃក្រុមហ៊ុនអាកាសចរណ៍ជាតិ និងអន្តរជាតិហោះចូលកម្ពុជា, អាកាសយានដ្ឋានអន្តរជាតិ និងច្រកទ្វារអន្តរជាតិនានាជាដើម។
ទី៣. ស្នើដល់គ្រប់ភាគីពាក់ព័ន្ធទាំងអស់ចូលរួមផ្សព្វផ្សាយ «កម្ពុជា ជាគោលដៅទេសចរណ៍ម្ហូបអាហារ» ដែលជាផ្នែកដ៏សំខាន់មួយនៃការចូលរួមដល់ការជំរុញពិពិធកម្មនៃវិស័យទេសចរណ៍កម្ពុជា ជាពិសេសចូលរួមផ្សព្វផ្សាយយុទ្ធនាការឆ្នាំទស្សនាកម្ពុជា ២០២៣ ដែលមានសារមួយ គឺ “គ្រប់រសជាតិគឺជាអច្ឆរិយភាព” (Every flavour is a Wonder) សម្រាប់ផ្សព្វផ្សាយពីម្ហូបអាហារនៅតាមតំបន់ និងគោលដៅនានានៅកម្ពុជា ដែលសុទ្ធតែមានរសជាតិ និងភាពពិសេសរៀងៗខ្លួន។
ទី៤. ស្នើឱ្យគ្រប់ភាគីពាក់ព័ន្ធទាំងអស់ចូលរួមបង្កើត និងបង្កើនការរៀបចំ និងផ្សព្វផ្សាយ «ផ្លូវទស្សនាចរណ៍កម្ពុជា» សម្រាប់ឆ្នាំ២០២៣ ដោយផ្តោតលើសក្តានុពលទេសចរណ៍ដ៏លេចធ្លោរបស់កម្ពុជា ដើម្បីបង្កើតជាខ្សែទស្សនកិច្ចថ្មីៗ និងទាក់ទាញប្រកបដោយភាពប្រកួតប្រជែងខ្ពស់។
ទី៥. ដើម្បីអនុវត្តវិធានការទី៩ នៃវិធានការគោលនយោបាយស្តីពីការបំផុសចលនាពីវិស័យសាធារណៈ និងឯកជនលើយុទ្ធនាការ «ថ្លៃ» និងស្របតាមអនុសាសន៍ណែនាំរបស់សម្តេចតេជោនាយករដ្ឋមន្ត្រី កាលថ្ងៃទី១៦ ខែមីនា ឆ្នាំ២០២៣ ដែលមានខ្លឹមសារណែនាំ «សូមឱ្យក្រសួងទេសចរណ៍ ក្រសួងពាណិជ្ជកម្ម ចូលរួមជាមួយគ្នាដើម្បីដាក់ជាតម្លៃ កុំឱ្យពិបាកសួរ ...», លោកបានស្នើដល់រដ្ឋបាលរាជធានី-ខេត្ត និងគ្រប់អាជីវកម្មទេសចរណ៍ទាំងអស់ ពិសេសសេវាកម្មម្ហូបអាហារត្រូវចូលរួមអនុវត្តតាមសារាចរណែនាំ លេខ ០០២សរណន. ចុះថ្ងៃទី១៧ ខែមីនា ឆ្នាំ២០២៣ ស្តីពីការរៀបចំដាក់តាំងបង្ហាញបញ្ជីរាយនាមសេវាកម្មរបស់អាជីវកម្មសេវាកម្មទេសចរណ៍ ដោយមានភ្ជាប់ជាមួយតម្លៃ។
ទី៦. ស្នើដល់ប្រជាពលរដ្ឋចូលរួមត្រៀមខ្លួនឱ្យបានរួចរាល់ក្នុងនាមជាម្ចាស់ផ្ទះរៀបចំព្រឹត្តិការណ៍កីឡាដ៏ធំ ដោយត្រូវចូលរួមផ្តល់បដិសណ្ឋារកិច្ចល្អ ប្រកបដោយភាពកក់ក្តៅ ដើម្បីទទួលស្វាគមន៍ភ្ញៀវទេសចរមកពីគ្រប់ទិសទី៕

This website, Tourismcambodia.org, the official website of Ministry of Cambodia of the Kingdom of Cambodia, is designed and maintained collaboratively by RED DOT (Cambodia) Co., Ltd and Cybernetics Ltd a full service branding and advertising agency in Cambodia. While efforts are made to ensure that all the information hereto are good, accurate and up to date, by visiting the website Tourismcambodia.org, viewing, accessing or otherwise using any of the services or information created, collected, compiled or submitted to Tourismcambodia.org, you agree to be bound by the our Terms and Conditions of Use, (Click here). If you do not want to be bound by our Terms, your only option is not to visit, view or otherwise use the services of Tourismcambodia.org. You understand, agree and acknowledge that these Terms constitute a legally binding agreement between you and Tourismcambodia.org and that your use of Tourismcambodia.org shall indicate your conclusive acceptance of this agreement.