(ខេត្តព្រះសីហនុ)៖ កាលពីថ្ងៃទី២១ ខែមិថុនា ឆ្នាំ២០១៩ នៅខេត្តព្រះសីហនុ ក្រសួងទេសចរណ៍បានរៀបចំសិក្ខាសាលាផ្សព្វផ្សាយច្បាប់ស្តីពីទេសចរណ៍ ជូនប្រតិបត្តិករទេសចរណ៍ជាជនជាតិចិន និងខ្មែរ ក្នុងគោលបំណងជំរុញការអនុវត្តច្បាប់ដើម្បីទប់ស្កាត់ផលប៉ះពាល់ជាអវិជ្ជមានដល់សង្គម វប្បធម៌ និងបរិស្ថាន ក្រោមអធិបតីភាព ឯកឧត្តម ទិត ចន្ថា រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម ថោង ខុន រដ្ឋមន្ត្រីក្រសួងទេសចរណ៍។

សិក្ខាសាលានេះបានរៀបចំជា ០៣ភាសា គឺភាសាខ្មែរ ចិន និងអង់គ្លេស ដោយមានមន្ត្រីជំនាញបកប្រែភាសាពីរាជបណ្ឌិត្យសភាកម្ពុជាផងដែរ។

ឯកឧត្តមរដ្ឋលេខាធិការបានជម្រាបជូនអង្គសិក្ខាសាលាស្តីពីនិន្នាការទេសចរណ៍ជាសាកល តំបន់ និងកម្ពុជា ដែលជាសារបញ្ជាក់ពីការវិវឌ្ឍនៃវិស័យទេសចរណ៍។ ឯកឧត្តមរដ្ឋលេខាធិការក្នុងនាមក្រសួងទេសចរណ៍ និងរាជរដ្ឋាភិបាលកម្ពុជា បានថ្លៃងអំណរគុណចំពោះវិនិយោគិនចិនដែលបានបណ្តាក់ទុនរកសុីលើវិស័យទេសចរណ៍នៅកម្ពុជា ពិសេសនៅខេត្តព្រះសីហនុ និងជួយជំរុញដល់ការអភិវឌ្ឍទេសចរណ៍ និងកំណើនទេសចរចិននៅខេត្តព្រះសីហនុ។

ឯកឧត្ត ទិត ចន្ថា បានណែនាំដល់ប្រតិបត្តិករទេសចរណ៍៖
១.ត្រូវគោរពច្បាប់ និងបទប្បញ្ញត្តនានារបស់រាជរដ្ឋាភិបាល
២.មុននឹងបើកអាជីវកម្មត្រូវសុំច្បាប់អនុញ្ញាតត្រឹមត្រូវ
៣.ចំពោះស្លាកយីហោ មុននឹងលើកស្លាកយីហោ អាជីវករត្រូវមកពិភាក្សាជាមួយអង្គភាពជំនាញ ដើម្បីជៀសវាងការសរសេរស្លាកយីហោខុស 
៤.ចំពោះអាជ្ញាធរភាគីព័ន្ធត្រូវជួយសម្របសម្រួល និងបង្កលក្ខណៈងាយស្រួលដល់វិនិយោគិន និងប្រតិបត្តិករទេសចរណ៍
៥. អាជ្ញាធរ និងអាជីវករត្រូវបើកចិត្តទូលាយក្នុងការពិភាក្សា និងដោះស្រាយនូវបញ្ហានានាដែលកើតមាន។